Archive for month: June 2018

PARROĊĊA MADONNA TAL-KARMNU, BALLUTA

AVVIŻI TAL-PARROĊĊA  – IL-ĦADD  01 ta’ Lulju 2018

1. IL-ĦAMIS, fis-7.15 p.m., fil-Pjazza tal-Balluta ser issir Adorazzjoni b’talb bi tħejjija għall-festa parrokkjali. Din ser tkun immexxija mill-Komunità Abramo.

2. Infakkru li dawk il-ġenituri li se jibagħtu lit-tfal tagħhom għat-tagħlim tal-katekiżmu f’Settembru li ġej, għandhom jieħdu l-applikazzjoni fl-uffiċċju parrokkjali.

3. Il-ĠIMGĦA hija l-ewwel Ġimgħa tax-xahar. Fis-5.45 p.m. ikun hawn adorazzjoni mmexxija mill-Grupp tal-Ħniena Divina.

4. IL-ĠIMGĦA wkoll ser tiġi organizzata Gozo by night. Biljetti mingħad Doris Mallia jew mill-uffiċċju parrokkjali.

5. Matul din il-ġimgħa ser jibda l-ġbir tal-envelopes mid-djar għall-festa parrokkjali mill-Prokuratur tal-festa. Infakkru li l-iskop tal-ġabra huwa li jitħallsu l-ispejjeż tal-istallazzjoni u l-konsum tad-dawl fil-ġimgħa tal-festa u biex isir il-ħlas ta’ erba’ mill-baned li jsiru fil-ġimgħa tal-festa.  L-ispejjeż tal-festa huwa kbar.  Napprezzaw ħafna l-għajnuna tagħkom ħalli niċċelebraw festa li tixraq lill-Patruna tagħna, l-Madonna tal-Karmnu.

6. Ħarġet ir-rivista FLIMKIEN li fiha l-fuljett tal-parroċċa. Il-helpers mitluba jiġbru l-kopji tagħhom mis-sagristija.

PARROĊĊA MADONNA TAL-KARMNU, BALLUTA

AVVIŻI TAL-PARROĊĊA  – IL-ĦADD  24 ta’ Ġunju 2018

1. IT-TLIETA, fl-okkażjoni t’għeluq iċ-ċentinarju mit-twaqqif tal-Parroċċa tal-Madonna tas-Sacro Cuor, ġejna mistiedna nieħdu sehem fit-tħejjija għall-festa. Dak inhar, fis-6.30 p.m. ser immexxu Quddiesa bis-sehem ta’ rappreżentanza mill-parroċċa tagħna.  Kulħadd huwa mistieden jingħaqad magħna biex naqsmu l-ferħ ta’ din l-okkażjoni ma’ waħda mill-parroċċi li minnhom ħarġet il-parroċċa tagħna.

2. Infakkru li dawk il-ġenituri li jixtiequ jibagħtu lit-tfal tagħhom għat-tagħlim tal-katekiżmu f’Settembru li ġej, għandhom jiġbru applikazzjoni mill-uffiċċju parrokkjali u jeħduha lura sa nhar il-Ħamis li ġej.

3. Nhar il-ĠIMGĦA 6 ta’ Lulju ser tiġi organizzata Gozo by night. Biljetti mingħad Doris Mallia jew mill-uffiċċju parrokkjali.

4. Matul din il-ġimgħa ser jitqassmu l-envelopes tal-aħħar ġabra tal-Festa mill-Prokuratur tal-festa. L-iskop tagħha huwa biex jitħallsu l-ispejjeż tal-istallazzjoni u l-konsum tad-dawl fil-ġimgħa tal-festa u biex isir il-ħlas għal erba’ baned li jsiru l-Erbgħa, l-Ħamis u ż-żewġ baned tal-Ħadd filgħaxija.  Ma’ dawn hemm ħlasijiet oħra.   B’kollox l-ispiża tlaħħaq għal madwar €12,000.  Napprezzaw ħafna l-għajnuna tagħkom ħalli niċċelebraw festa li tixraq lill-Patruna tagħna, l-Madonna tal-Karmnu.

5. Nixtiequ nagħmlu appell għal voluntiera biex jgħinu lill-Kummissjoni Festa Esterna fl-armar tal-festa. Kull għajnuna hija apprezzata.  Min jixtieq joffri l-għajnuna tiegħu, huwa mitlub ikellem lill-Kappillan.  Nirringrazzjawkom bil-quddiem.

 PARROĊĊA MADONNA TAL-KARMNU, BALLUTA

AVVIŻI TAL-PARROĊĊA  – IL-ĦADD  17 ta’ Ġunju 2018

1. IT-TNEJN, fis-7.15 p.m., fiċ-Ċentru, ser jiltaqgħu l-Grupp ta’ Talb iffurmat wara l-Life in the Spirit Seminars. Il-laqgħa hija miftuħa għal kulħadd.

2. IT-TLIETA, fis-7.15 p.m., fiċ-Ċentru ssir il-laqgħa tal-Grufan.

3. IS-SIBT U L-ĦADD LI ĠEJ sejra ssir il-ġabra magħrufa bħala l-“Offerta ta’ San Pietru”. Bil-ġabra nkunu qegħdin nuru l-imħabba tagħna lejn il-Papa Franġisku u ngħinuh ikompli jagħmel għotjiet ta’ karità mad-dinja kollha ma’ ħutna l-aktar fil-bżonn, speċjalment ma’ dawk milqutin minn xi emerġenza, diżastru naturali jew gwerra.  Il-Vigarju Ġenerali jħeġġeġna biex nkunu ġenerużi f’din il-ġabra.

4. Il-ġenituri li jixtiequ jibagħtu lit-tfal tagħhom għat-tagħlim tal-katekiżmu f’Settembru li ġej, għandhom jiġbru applikazzjoni mill-uffiċċju parrokkjali u jeħduha lura sat-28 ta’ Ġunju.

5. Ser tiġi organizzata Gozo by night nhar il-ĠIMGĦA 6 ta’ Lulju. Biljetti mingħad Doris Mallia jew mill-uffiċċju parrokkjali.

PARROĊĊA MADONNA TAL-KARMNU, BALLUTA

AVVIŻI TAL-PARROĊĊA  – IL-ĦADD  10 ta’ Ġunju 2018

1. IL-ĦAMIS huwa l-Jum Dinji tad-Donaturi tad-Demm.  Tajjeb  niftakru fil-valur kbir li dawk li jistgħu jaghtu d-demm, u li dan jagħmluh b’sens ta’ mħabba u b’għozza tal-ħajja umana.

2. IS-SIBT huwa JUM IL-PARROĊĊA. Dak inhar il-Quddiesa tas-6.30 p.m. ser tkun bis-sehem tat-tfal u l-familji.  L-operaturi pastorali kollha huma mħeġġa jieħdu sehem biex infakkru t-twaqqif tal-parroċċa tagħna.

3. FL-OKKAŻJONI TA’ JUM IL-MISSIER, il-Quddies kollu tas-Sibt filgħaxija u l-Ħadd, ser ikun għall-bżonnijiet tal-missirijiet tagħna ħajjin jew mejtin. Ħdejn il-bibien tal-knisja hemm envelopes b’formola li fiha nistgħu niktbu l-isem tal-missirijiet mejtin.  L-envelope għadduh lil xi ħadd mill-patrijiet jew lis-sagristan.

4. Fadal l-aħħar żewġ postijiet għall-Pellegrinaġġ għal-Lourdes bejn l-20 u l-24 ta’ Awwissu. Informazzjoni u booking mill-uffiċċju parrokkjali.

5. Il-Kunsill Lokali San Giljan jixtieq jgharraf lill-pubbliku li ser jibda jipprovdi s-servizz ta’ Mini-Van mill-Bajja tal-Balluta ghal Ta’ Giorni mill-15 ta’ Gunju 2018 sal-15 ta’ Settembru 2018 fid-9.30p.m. u fil-10.30p.m.

6. IL-LEJLA fis-6.00 p.m., titkanta t-Talba ta’ filgħaxija quddiem Ġesù Ewkaristija. Fis-6.30 p.m. ser issir Quddiesa bis-sehem tat-tfal u l-familji u wara Purċissjoni tal-Qalb ta’ Ġesù bis-sehem tat-tfal tal-Ewwel Tqarbina.

Link ghall-Video – https://youtu.be/Tuz6zE4bd9w

Merħba! Il-Papa jistieden lil bnedmin ta’ rieda tajba sabiex ningħaqdu flimkien u nitolbu:
Biex in-networks soċjali jaħdmu favur l-inklużjoni li tirrispetta d-differenzi tal-oħrajn.

Ninġabar:
Insib pożizzjoni komda u niffoka fuq in-nifs. Nitlob lil Alla biex jgħini f’dan il-ħin ta’ talb. Naħseb fuq kemm hawn modi ta’ komunikazzjoni u kif jien nużahom fil-ħajja ta’ kuljum.

Naħseb ftit:
X’importanza nagħti lill-komunikazzjoni mal-oħrajn?
Kemm noqgħod attent/a li nirrispetta lill-oħrajn meta nikkomunika fuq networks soċjali?
Ġieli osservajt li qed issir diskriminazzjoni ma’ xi grupp ta’ nies fuq xi network soċjali? Kif irreaġixxejt?

Nitlob:
Mulej, agħtini l-grazzja li nuża n-networks u l-mezzi ta’ komunikazzjoni soċjali b’mod li nirrispetta lill-oħrajn u li nwassal messaġġi pożittivi u inkoraġġanti.

Kliem ta’ dawl:
In-networks soċjali jistgħu jiffaċilitaw ir-relazzjonijiet u jippromwovu t-tajjeb tas-soċjetà, imma jistgħu wkoll iwasslu għal diviżjoni bejn individwi u gruppi. Id-dinja diġitali hija pjazza pubblika, post fejn tiltaqa’ u fejn tista’ tinkoraġġixxi jew twaqqa’ lill-ieħor, tieħu sehem f’diskussjoni jew tattakka. Papa Franġisku

X’nista’ nagħmel:
Nikkomunika fuq xi network soċjali permezz ta’ messaġġi posittivi u li juru l-importanza tar-rispett u l-inklużjoni.

Fatt ċkejken:
Damian kien iħobb it-teknoloġija u kien jqatta’ ħin twil isegwi diversi networks soċjali, speċjalment Facebook. Imma issa kien għeja jara lill-persuni b’diżabilità jiġu ppreżentati bħala oġġett ta’ karità jew bħala xi hero. Għalih dawn iż-żewġ stampi ma kinux qed juru r-realtà ta’ ħajtu u ta’ sħabu. Għall-kuntrarju, hu jemmen li l-persuna b’diżabilità għandha dritt li tkun indipendenti finanzjarjament u mhux tistrieħ fuq il-karità. Kien ukoll josserva li minkejja li Facebook għandu potenzjal jilħaq ħafna nies, ftit li xejn kien hemm persuni b’diżabilità li jużaw dan iċ-ċans biex jikkomunikaw ma’ ħaddieħor.
Wara li kien ilu jtella’ u jniżżel, iddeċieda li jibda sensiela ta’ messaġġi fuq Facebook bl-għan li jiżdied l-għarfien dwar il-persuni b’diżabilità u jrawwem iktar rispett lejhom. Fl-istess waqt, ta’ kuljum kien jikkummenta dwar temi li mhumiex relatati mas-settur tad-diżabilità, biex iwassal il-messaġġ li l-ħajja għal persuni bħalu ma ddurx biss mad-diżabilità. Permezz ta’ Damian, kien hemm diversi nies li kienu jikkummentaw, jirriflettu u xi wħud waslu biex bdew il-paġna tagħhom ukoll.

 PARROĊĊA MADONNA TAL-KARMNU, BALLUTA

AVVIŻI TAL-PARROĊĊA  – IL-ĦADD  3 ta’ Ġunju 2018

1. L-ERBGĦA, L-ĦAMIS U L-ĠIMGĦA huma ġranet ta’ tħejjija għall-festa tal-Qalb ta’ Ġesù. Fit-tliet ijiem, fis-6.00 p.m. jingħad ir-Rużarju quddiem Ġesù Ewkaristija u fis-6.30 p.m. Quddiesa b’Omelija mill-Kappillan fuq l-Eżortazzjoni Appostolika l-ġdida tal-Papa Franġisku, “IFIRĦU U THENNEW”.

2. L-ERBGĦA, fit-8.00 p.m., fi Ġnien Indipendenza, ningħaqdu mal-Parroċċa ta’ S. Girgor għal adorazzjoni mmexxija minn membri tal-Youth Fellowship.

3. IL-ĦAMIS, fis-5.45 p.m., ikun hawn adorazzjoni li fiha jingħad ir-Rużarju quddiem Ġesù ewkaristija.

4. IL-ĠIMGĦA, wara l-Quddiesa tas-6.30 p.m., fil-knisja, jkun hawn adorazzjoni bis-sehem tal-Ministri Straordinarji tat-Tqarbin, tal-Letturi, membri tal-Għaqdiet u tal-operaturi pastorali kollha.

5. IL-ĦADD, issir il-Festa tal-Qalb ta’ Ġesù. Fis-6.00 p.m., titkanta t-Talba ta’ filgħaxija quddiem Ġesù Ewkaristija.  Fis-6.30 p.m. ser issir Quddiesa bis-sehem tat-tfal u l-familji u wara Purċissjoni tal-Qalb ta’ Ġesù bis-sehem tat-tfal tal-Ewwel Tqarbina.

6. Nhar is-7 ta’ Ġunju, il-Viċi-Postulatur tal-Kawża ta’ P. Avertan, se jorganizza pellegrinaġġ fl-imkejjen marbuta mal-ħajja ta’ P. Avertan f’dawn il-lokalitajiet: il-Mosta, Il-Belt, il-Balluta, ir-Rabat u l-Imdina. Il-Pellegrinaġġ jinkludi informazzjoni, talb u quddiesa u wkoll ‘packed lunch’.  Il-pellegrinaġġ, li jinkludi wkoll Quddiesa, jibda fid-9.00am mill-Furjana u fi tmiem il-pellegrinaġġ it-trasport iwassal lil kulħadd il-Belt fil-5pm.  Min hu nteressat jieħu sehem jirreġistra fis-sagristija sal-4 ta’ Ġunju.

7. FL-OKKAŻJONI TA’ JUM IL-MISSIER, il-Quddies kollu tas-Sibt filgħaxija u l-Ħadd, 16 u 17 ta’ Ġunju jkun għall-bżonnijiet tal-missirijiet tagħna ħajjin jew mejtin. Ħdejn il-bibien tal-knisja hemm envelopes b’formola li fiha nistgħu niktbu l-isem tal-missirijiet mejtin.  L-envelope għadduh lil xi ħadd mill-patrijiet jew lis-sagristan.
8. Fadal xi postijiet għall-Pellegrinaġġ għal-Lourdes bejn l-20 u l-24 ta’ Awwissu. Informazzjoni u booking mill-uffiċċju parrokkjali.
9. Il-lejla fis-7.15 p.m., fi Ġnien Indipendenza, ser jingħad ir-Rużarju quddiem l-istatwa tal-Madonna.