Avviżi – 31/12/17
PARROĊĊA MADONNA TAL-KARMNU, BALLUTA
AVVIŻI TAL-PARROĊĊA IL-ĦADD 31 ta’ Diċembru 2017
- (IL-ĦADD), Il-Lejla, fis-6.00 p.m. ikun hawn Adorazzjoni u fis-6.30 p.m. Quddiesa b’radd ta’ ħajr għal din is-sena. F’dik il-Quddiesa ser issir ġabra speċjali għad-Dar tal-Providenza.
- L-EWWEL TAS-SENA, festa ta’ Marija Omm Alla, hija festa kmandata. Il-Quddies ikun bħal nhar ta’ Ħadd, u ma jkunx hawn Quddies f’nofsinhar.
- IL-ĠIMGĦA, l-Ewwel Ġimgħa tax-xahar, fis-5.45 p.m. ikun hawn adorazzjoni mmexxija mill-Grupp tal-Ħniena Divina.
- IS-SIBT, l-Ewwel Sibt, wara l-Quddiesa tad-9.30 a.m. ikun hawn ir-Rużarju Meditat.
- IL-ĦADD, il-Quddiesa tad-9.00 a.m. ser tkun bis-sehem tat-tfal u l-familji u ser tixxandar fuq l-istazzjon TVM. Il-familji huma mħeġġa jieħdu sehem.
Dak inhar fl-10.00 a.m., fiċ-Ċentru Titu Brandsma, ikun hemm il-laqgħa tat-Terzjarji Karmelitani.
- IL-ĦADD, l-Ewwel Ħadd tax-xahar. Il-ġabra tkun għall-bżonnijiet tal-knisja u biex jinġabru fondi għall-proġett tal-Lift minn Triq Scicluna. Bi pjaċir inħabbru li l-permess għal-Lift ħareġ. Issa jmiss li nkomplu dan il-ġbir ħalli nkunu nistgħu nibdew. Mill-ispiża tas-sound baqa’ l-aħħar €4700 x’jitħallsu. Il-ġbir u d-donazzjonijiet li saru f’Diċembru kienu ta’ €1795. Nirringrazzjawkom bil-quddiem tal-għajnuna tagħkom.
- Il-FLIMKIEN ta’ Jannar bil-fuljett TAL-KARMNU BALLUTA, ħareġ. Il-helpers mitluba jiġbru l-kopji tagħhom mis-sagristija.
- Il-letturi mitlua jiġbru kopja tar-roster tagħhom mis-sagristija.
- Nawguraw s-Sena t-Tajba lilkom u lill-famlji tagħkom. IS-SENA T-TAJBA LIL KULĦADD.
Avviżi – 24/12/17
- (IL-ĦADD), Il-Lejla fis-6.30 p.m. jkun hawn il-Quddiesa tal-Vġili. Il-Velja tal-Milied tibda fid-9.30 p.m. u tinkludi talb, kant, il-purċissjoni ta’ Ġesù Bambin u l-priedka tradizzjonali tal-Milied, li din is-sena ser ssir minn Emma Vella. Fl-10.30 pm issir il-Quddiesa ta’ bil-lejl. Din tieħu post il-Quddiesa ta’ nofsillejl. Inħeġġu lil kulħadd jingħaqad magħna.
- GĦADA (IT-TNEJN), JUM IL-MILIED, hija festa kmandata. Il-Quddies ikun bħal ta’ nhar ta’ Ħadd, imma ma jkunx hawn Quddies f’nofsinhar.
- IL-ĦAMIS fil-5.00 p.m. ser isir PARTY TAL-MILIED GĦAT-TFAL tal-Parroċċa fiċ-Ċentru Titu Bransma. Biljett mill-uffiċċju parrokkjali.
- Nirringrazzjaw lil dawk kollha li offrew affarijiet tal-ikel għall-hampers għall-familji fil-bżonn.
- IS-SIBT, bejn l-10.00 am u nofsinhar, mistednin nagħtu l-awguri tagħna personali lil Mons. Arċisqof Charles Jude Scicluna fil-Kurja, l-Furjana. Min jixtieq jingħaqad mal-Parroċċa, jikteb ismu fis-sagristija.
- IL-ĦADD, L-AĦĦAR TAS-SENA, fis-6.00 p.m. ikun hawn Adorazzjoni u fis-6.30 p.m. Quddiesa b’radd ta’ ħajr għal din is-sena. F’dik il-Quddiesa ser issir ġabra speċjali għad-Dar tal-Providenza.
- NHAR L-EWWEL TAS-SENA, festa ta’ Marija Omm Alla, hija festa kmandata. Il-Quddies ikun bħal nhar ta’ Ħadd, u ma jkunx hawn Quddies f’nofsinhar.
- F’dawn il-ġranet, fil-Każin tas-Soċjetà Mużikali Madonna tal-Karmnu, Balluta, qed issir Wirja ta’ Presepju statiku. Inħeġġukom iżżuruh u tapprezzaw ix-xogħol artistiku maħdum mis-Sur Adrian Busuttil u t-tim tiegħu. Miftuħ bejn il-5.00 u t-8.30 p.m. kuljum. Ħdud u festi jiftaħ ukoll bejn id-9.30am u n-12.30 p.m.
- Nawguraw lilkom u lill-familji tagħkom, MILIED qaddis mimli bil-ferħ u l-paċi tal-Mulej. IL-MILIED IT-TAJJEB LIL KULĦADD.
Avviżi – 17/12/17
PARROĊĊA MADONNA TAL-KARMNU, BALLUTA
AVVIŻI TAL-PARROĊĊA IL-ĦADD 17 ta’ Diċembru 2017
- IT-TNEJN tkompli n-Novena ta’ Ġesù Bambin. Kull filgħaxija, fis-6.00 p.m. ssir adorazzjoni li fiha tingħad it-Talba ta’ Filgħaxija, jinqara ħsieb fuq persunaġġ tal-Presepju u titkanta l-Kurunella ta’ Ġesù Bambin. Waqt il-Quddiesa jkun hemm ħsieb qasir fuq il-Vanġelu.
- IL-ĦAMIS, fis-6.30 p.m., minn ħdejn il-Kappella ta’ Ġesù Ħabib, fi Triq P. Marjan, titlaq il-Purċissjoni bil-Bambin li ser tgħaddi minn dawn it-toroq: Camenzuli, Ġafar, Manwel Dimech, S. Elena, Neriku, Kulleġġ L-Antik u Scicluna fejn tintemm fiċ-Ċentru Titu Prandsma.
- IS-SIBT, wara l-Quddiesa tas-6.30 p.m., ser isir il-Kunċert tal-Milied mill-Kor tal-Parroċċa, il-Marie-Therese Voice Choir. Kulħadd huwa mistieden. Din is-sena il-Kunċert ser isir b’risq il-proġett tal-lift minn Triq Scicluna għall-knisja.
- Il-Ħadd, Lejlet il-Milied, il-ħin tal-Quddies ikun bħas-soltu, inkluża dik tas-6.30 p.m. Il-Velja tal-Milied din is-sena ser tibda fid-9.30 p.m. biex fl-10.30 pm issir il-Quddiesa ta’ bil-lejl. Din tieħu post il-Quddiesa ta’ nofsillejl. F’nhar il-Milied u f’nhar l-Ewwel tas-Sena ma jkunx hawn Quddies f’nofsinhar.
- IL-ĦAMIS 28 ta’ Diċembru, fil-17.00 ser isir PARTY TAL-MILIED GĦAT-TFAL tal-Parroċċa fiċ-Ċentru Titu Bransma. Biljett mill-uffiċċju parrokkjali.
- Bħalissa fil-kuritur tal-ġenb tal-knisja, qed isir BAZAAR b’risq il-knisja b’affarijiet addattati għal dan iż-żmien tal-Milied. Wara l-Quddiesa wieħed jista’ jżuru u jgħin fil-bżonnijiet tal-knisja. Il-Bazaar jintemm il-lejla u jiftaħ bejn il-5.00 u 7.15 p.m. Dalgħodu miftuħ bejn id-9.00 a.m. u s-1.00 p.m.
Poeżiji għal żmien il-Milied
IL-PREZENTAZZJONI TA’ ĠESU’ FIT-TEMPJU
MARIJA U ĠIUZEPPI ĦADU L-ĠESU’ FIT-TEMPJU,
GĦAX L-EWWEL TIFEL MWIELED FIL-FAMILJA,
KELLU JIĠI PPREZENTAT LIL MULEJ
KIF KIENET TITLOB IL-LIĠI LHUDIJA.
KIEN JIĠI OFFRUT ANNIMAL B’SAGRIFIĊJU,
U B’TIFKIRA TA DIL-PREZENTAZZJONI,
NARAW LIL ĠIUZEPP B’PAR BĊIEĊE N F’IDEJH,
BIEX JAQDI SEW L-IMBIERKA TRADIZZJONI,
IL-PROFETA XMUN U L-PROFETESSA ANNA,
LAQGĦU LIT-TARBIJA F’ĠERUSALEM,
WAQLI LI XMUN KIEN MGĦARRAF MINN ALLA NNIFSU,
QABEL RA L-MESSIJA MA KELLUX JINTEMM.
TISTGĦU TAĦSBU X’FERĦ KELLU X’ĦIN RA ‘L ĠESU’,
ĦADU JIĠRI M’GĦAND MARIJA FUQ IDEJH,
BEDA JXANDAR U JFAĦĦAR LIL KBIR ALLA,
B’ENTUZJAZMU KBIR B’ĠESU’ VIĊIN ĦDEJH.
‘ISSA TISTA’ TIEĦU S-SERV TIEGĦEK KIF WGĦEDT,
GĦAX GĦAJNEJJA RAW IS-SALVAZZJONI TIEGĦU,’
JEKK AĦNA NOSSERVAW SEW IL-LIĠI TIEGĦU,
NIMXU UKOLL LEJN IS-SALVAZZJONI TIEGĦU.
JEKK INT TIMXI HEKK TAJJEB FIT-TRIQ TAJBA,
U TASAL HEKK SAL-PONT TAL-MEWT TIEGĦEK,
DDUR B’KUNFIDENZA, U TGĦID LIL – MULEJ,
‘ISSA TISTA INT MULEJ TIEĦU S-SERV TIEGĦEK’
JEKK NEMMEN F’DIL ĦAJJA NISRANIJA,
U NARA ‘L ĠESU DEJJEM B’GĦAJNEJN IL-FIDI,
IKOLLI MERTU AKBAR MINN TAL-PROFETA,
GĦAX NEMMEN FIH BLA MA NAQBDU F’IDI.
Pawlu Mifsud
IL-MAGĦMUDIJA TA’ ĠESU
IL-MAGĦMUDIJA TA ĠWANNI TĦABBRILNA AĦBAR TAJBA,
LI S-SALTNA T’ALLA TINSAB FIL-QRIB TAGĦNA,
U LI L MESSIJA MA JDUMX MA JIDHER,
GĦALHEKK ĠWANNI RSISTA GĦAT-TĦEJIJA SEW TAGĦNA.
MINN NAĦA L-OĦRA TĦABRILNA L-ISTAT TA’RUĦNA,
FEJN GĦANDHA BZONN TITWIELED MILL-ĠDID,
TINDEM, JISGĦOBIJA GĦAL DNUBIETHA,
U TLESTI KULL TĦEJIJA TA’ TIĠDID.
L-LHUD KIENU JAĦSBU LI M’GĦANDHOMX BZONN TA’ TIĠDID,
GĦAX KIENU JOSSERVAW IL-LIĠIJIET TAGĦHOM.
JEMMNU LI GĦANDHOM B’ABRAHAM MISSIERHOM,
U M’GĦANDHOM BZONN XEJN X’JIRRANĠAW F’ĦAJJITHOM,.
WAQT LI DAWN RAW LI ĠWANNI TANT IKRAĦ,
SĦABHOM MIDIMBA RAW LIL ĠWANNI SALVATUR,
GĦAX KIEN QED JIMLIHOM B’TAMA ĠDIDA,
JEKK JITGĦAMMDU F’ISEM KRISTU L-MAĦTUR,
AĦNA SPISS NAGĦMLU BĦAL DAWK IL-LHUD ĦZIENA,
GĦAX NGĦIDU XI FTIT TALB GĦAL ĦTIĠIJIETNA
JEW GĦAX MEMBRI F’XI KONFRATERNITA’
M’GĦANDNIEX BZONN NISTQARRU ĦTIJIETNA.
PERSONALMENT NARAW SPISS ĦTIJIETNA,
MA NAĦSBUX LI AĦNA TANT QADDISIN,
GĦAX NERFGĦU F’KULL VARA LI GĦANDNA,
JEW GĦAX ĦBIEBNA GĦANDNA IL-QASSISIN.
Pawlu Mifsud
Avviżi – 10/12/17
PARROĊĊA MADONNA TAL-KARMNU, BALLUTA
AVVIŻI TAL-PARROĊĊA IL-ĦADD 10 ta’ Diċembru 2017
- IT-TLIETA, fis-7.15 p.m., fiċ-Ċentru, ssir il-laqgħa tal-Grufan.
- IL-ĠIMGĦA, tibda n-Novena ta’ Ġesù Bambin. Kull filgħaxija, fis-6.00 p.m. ssir adorazzjoni li fiha tingħad it-Talba ta’ Filgħaxija u ssir tul il-ġranet tan-Novena, ssir mixja mal-persunaġġi tal-Presepju u titkanta l-Kurunella ta’ Ġesù Bambin.
- IL-ĠIMGĦA, fis-6.30 p.m., ser issir il-Vestizzjoni tal-Abbatini li jservu f’din il-Knisja Parrokkjali. Filwaqt li nirringraazzjawhom tal-impenn tagħhom, nitolbu għalihom biex jaqdu fis-servizz tal-artal b’dedikazzjoni u b’imħabba.
- IL-ĦADD, il-Quddiesa tal-10.00 a.m., tkun bis-sehem tat-tfal u l-familji. Fiha jsir it-tberik tal-Bambini li jġibu magħhom it-tfal.
- INFAKKRU li Lejlet il-Milied, ikun hawn il-Quddiesa tal-Vġili fis-6.30pm. Il-Velja tal-Milied din is-sena ser tibda fid-9.30 p.m. biex fl-10.30 pm issir il-Quddiesa ta’ bil-lejl. F’nhar il-Milied u f’nhar l-Ewwel tas-Sena ma jkunx hawn Quddies f’nofsinhar.
- Ħdejn l-artal poġġejna żewġ t’iqfief li fihom tistgħu tqegħdu affarijiet ta’ ikel preservat bħala karità għal żmien l-Avvent, biex il-Kummissjoni Djakonija tkun tista’ tqassamhom lill-persuni fil-bżonn. Żmien sa nhar l-Erbgħa li ġejjin.
- IL-ĦAMIS 28 ta’ Diċembru, fil-17.00 ser isir PARTY TAL-MILIED GĦAT-TFAL TAL-Parroċċa fiċ-Ċentru Parrokkjali. Biljett mill-uffiċċju parrokkjali.
- Nirringrazzjaw lill-helpers kollha ul-membri tal-komunità Karmelitana li nhar s-Sibt u l-Ħadd li għadda taw is-sehem tagħhom fiċ-Ċensiment li sar fil-knisja. Grazzi wkoll lil dawk kollha li ħadu ħsieb l-organizzazzjoni kollha li saret fil-parroċċa.
- Bħalissa fil-kuritur tal-ġenb tal-knisja, qed isir BAZAAR b’risq il-knisja b’affarijiet addattati għal dan iż-żmien tal-Milied. Ikun miftuħ kuljum sa nhar il-Ħadd bejn il-5.00 u 7.15 p.m. Il-Ħdud jiftaħ ukoll bejn id-9.00 a.m. u s-1.00 p.m.
Bazaar tal-Milied
Ħsibijiet għall-Milied Qaddis
- IL–VERU SPIRTU TAL–MILIED
X’NIFHMU AĦNA BL-ISPIRTU TAL-MILIED?
IR-RIGALI KBAR LI NAGĦTU LILL-ULIED?
JEW IL-‘PARTIES’ FEJN NISTIEDNU N-NIES,
U NIXXALAW MAGĦHOM B’FINI BLA QIES?
DA JINSAB F’MAXTURA F’ GROTTA ĊKEJKNA,
FUQ WIĊĊ TARBIJA LI NIZLET ĦDEJNA,
X’NISTGĦU NOFFRULHA ‘L DIT-TARBIJA
BIEX NPATTULHA KSIEĦ IL-FISQIJA?
M’GĦANDHIEX BZONN FIDDA U L-ANQAS XEJN,
TRID LI NPATTULHA GĦAL DARBA TNEJN.
TRIDNA NĦOBBU IL-PROXXMU TAGĦNA,
NZOMMU ‘L KULĦADD B’ĦABIB KBIR TAGĦNA.
NGĦINU ‘L DAWK L-ANQAS IXXURTJATI,
U DAWK MINN KULĦADD ABBANDUNATI.
TRIDNA NIFHMU AKTAR LIL XULXIN,
NGĦINU U NAGĦDRU AKTAR LIL XULXIN.
DAWN L-ILWIEN SBIEĦ LI JOĦORĠU MILL-QALB,
LI NGĦINU ‘L ĦAFNA BL-GĦOTJIET U T-TALB.
DIN IL-MIXEGĦLA LI TRID TIDHER FIL-QLUB,
PAĊI MĦABBRA MILL-ANĠLI F’SEMA MIKTUB.
DAWN HUMA D-DWAL LI JIXEGĦLU D-DJAR TAGĦNA,
JEKK INZOMMU ‘L KULĦADD PAĊI MAGĦNA.
DAN HU T-TEPTIP TAD-DWAL JIĠRU F’XULXIN,
JEKK ĠENTILI U’QALB TAJBA MA XULXIN.
MMORRU NFITTXU L-ĠESU B’DAWL F’IDEJNA,
BL-ISPIRTU LI MINN KULL ĠLIED ĊEDEJNA.
IT-TOGĦMIET BNINI JGĦADDU MAL-MILIED,
IT-TQARBIN JAGĦMILNA T’ALLA L-ULIED.
B’HEKK NSEWDU QALBNA WAQT LI NZARMAW
KOLLOX JGĦADDI, XEJN AKTAR MA NARAW.
KOLLOX ILWIEN SBIEĦ MINN TAS-SAPUN.
LI JINFAQGĦU FIX-XEJN TMIEM L-ISTAĠUN.
- LIEMA HU L-AKBAR FERĦ TAGĦNA FIL-MILIED
ALLA ĦALAQ PERFETTA DINJA,
ĦIELSA KIENET MILL-MEWT U TBATIJA,
‘MMA ADAM U EVA L-EWWEL BNEDMIN,
ĠĠIELDU M’ALLA SARU MIDIMBIN.
IMMA SAR PATT MINN ALLA B’TIFĦIR
BIEX JIRRANĠA D-DINJA MINN KULL TKISSIR,(ĠEN 2:17)
QAJJEM ĠLIEDA BEJN XITAN U MARA,
BEJN IZ-ZERGĦA TIEGĦU U DIK TAL-MARA.
HIJA TISĦAQQLU DIK IR-RAS TIEGĦU,
U TISĦAQQ UKOLL DAK L-GĦARQUB TIEGĦU.
FL-AĦĦAR SEĦĦ DAK KOLLU MWIEGĦED,
F’ĠUFHA L-IBEN T’ALLA KIEN MQIEGĦED.
ĦALLIEQ ID-DINJA JITWIELED F’MAXTURA,
IR-RGĦAJJA B’KULL TAMA MARRET TADURA.
SAKEMM FL-AĦĦAR NIESU STESS QATLUH,
MA ZOKK TA’ SIĠRA HUMA SALBUH.
OFFRA RUĦHU GĦALINA BIR-RIEDA TIEGĦU,
BIEX KOLLNA KEMM AĦNA NSALVAW MIEGĦU.
DAWK LI JEMMNU FIH KOLLHA JSALVAW,
U ‘L-WIĊĊ ĦIENI T’ALLA HUMA JARAW.
HU MA BGĦATX L-IBNU JIKKUNDANNANA
IMMA BGĦAT L-IBNU BIEX ISALVANA,(ĠAN. 3: 15-17)
DAN L-AKBAR FERĦ IL-MILIED TIFRAĦ BIH,
F’DAN JMISSNA NAGĦTU ‘L ALLA L-AKBAR ĠIĦ,
GĦAX SPIĊĊAT TAL-MEWT KULL STORJA,
FIHA ĠIET MIBLUGĦHA L-VITTORJA,
FEJNHA JA MEWT IN-NIGGIEZA TIEGĦEK,
FEJNHA AKTAR DIK L-ARJA TIEGĦEK?
IN-NIGGIEZA TAL-MEWT HUWA D-DNUB,
GĦALINA ĠESU REBAĦ FUQ KULL DNUB.(1 KOR.15:54-57)
DAN HU L-VERU SENS TA’ FERĦ TAL-MILIED.,
NAĦSBU F’KULL REBĦ LI SAR FIL-MILIED.
JEKK AĦNA NIFIRĦU F’TAGĦNA R-REBĦIET,
SEW DAWK ĊIVILI , U L-OĦRA IL-KISBIET,
KEMM GĦANDNA AKTAR BIL-WISQ NIFIRĦU,,
LI F’REBĦIEET R-RUĦ TANT QED NIMIRĦU.
JEKK F’DAWK ĊIVILI B’DEMNA TĦABATNA,
F’DAWK TAR-RUĦ BIL-GRAZZJA QLAJNA.
- TĦEJJIJA GĦALL-AVVENT
L-AVVENT IWAQQAFNA FTIT MILL-ĦSIEB FRENETKU,
LI JĠIB MIEGĦU MILIED KUMMERĊJALI,
BIEX INĦEJJU RUĦNA GĦALL-VERU SENS TAL-MILIED,
LI TWIELED GĦALINA SALVATUR IMPERJALI.
L-AVVENT MA JIXGĦELX DAWL JGĦAMMEX L-GĦAJNEJN,
IZDA L-VJOLA LEWN I L-PENITENZA,
ĦA NĦEJJU QLUBNA B’QALB NIEDMA GĦAL MULEJ,
U ‘ NIDĦLU QUDDIEM ĠESU B’KUNFIDENZA.
FL-AVVENT NIPPREPARAW RUĦNA GĦAL TLETT MIĠJIET,
L-EWWEL LI DEHER F’GĦAR TAL-ANNIMALI,
IT-TIENI LI NWELLDUH LKOLL F’QALBNA
L-AĦĦAR IL-MIĠJA FIL-ĠUDIZZJU UNIVERSALI.
TAJJEB LI NĦEJJU XORB U’IKEL BNIN
XIERAQ NZEJNU NFAKKRU L-ĠRAJJA,
IMMA MA JISWA XEJN GĦALINA,
JEKK IMBARRU LIL ĠESU MILL-ĠRAJJA,
L-IKEL U L-FEST JGĦADDU U JISPIĊĊAW,
IX-XEJXI U T-TEPTIP JINTFEW ANNUNA.
IZDA JEKK KRISTU JKUN DAĦAL F’QALBNA,
IL-GLORJA U L-FERĦ JIBQGĦU JHENNUNA.
Diċembru 2017
Avviżi – 03/12/17
PARROĊĊA MADONNA TAL-KARMNU, BALLUTA
AVVIŻI TAL-PARROĊĊA IL-ĦADD 3 ta’ Diċembru 2017
- DALGĦODU U GĦADA T-TNEJN, fl-10.00am, fiċ-Ċentru jkun hemm il-laqgħa tat-Terzjarji Karmelitani.
- IL-ĦAMIS fiċ-Ċentru Titu Brandsma, fis-7.15 p.m. ikomplu s-serje ta’ laqgħat bl-isem ta’ LIFE IN THE SPIRIT SEMINARS miftuħa għal kull min jixtieq jikber fil-ħajja nisranija tiegħu.
- IL-ĠIMGĦA, hija l-Festa tal-IMMAKULATA KUNĊIZZJONI. Il-Quddies ikun bħal ta’ fost il-ġimgħa. Huwa xieraq li nqaddsu din il-ġurnata billi nieħdu sehem f’Quddiesa.
Dak inhar, fit-3.30 p.m., fiċ-Ċentru Titu Brandsma, ikomplu it-tħejjija ta’ ikel tajjeb għas-saħħa minn nutritionist professjonali.
Dak inhar ukoll, mill-4.30 p.m. ‘l quddiem, fil-kuritur tal-ġenb tal-knisja ser isir BAZAAR għal dan iż-żmien tal-Milied. Dan ser ikun miftuħ kuljum bejn il-5.00 u s-7.00 p.m. sas-17 ta’ Diċembru.
Fis-7.15 p.m. fi Ġnien l-Indipendenza jingħad r-Rużarju quddiem l-istatwa tal-Madonna.
- Navżaw minn issa li Lejlet il-Milied, ikun hawn il-Quddiesa tal-Vġili fis-6.30pm. Il-Velja tal-Milied din is-sena ser tibda fid-9.30 p.m. biex fl-10.30 pm issir il-Quddiesa ta’ bil-lejl. F’nhar il-Milied u f’nhar l-Ewwel tas-Sena ma jkunx hawn Quddies f’nofsinhar.
- Ħdejn l-artal poġġejna żewġ t’iqfief li fihom tistgħu tqegħdu affarijiet ta’ ikel preservat bħala karità għal żmien l-Avvent, biex il-Kummissjoni Djakonija tkun tista’ tqassamhom lill-persuni fil-bżonn.